Luz verde dos accionistas do Pontevedra á nova ampliación de capital por valor de 721.000 euros
Por Diego Espiño & Mónica Patxot
Os accionistas do Pontevedra Club de Fútbol aprobaron este luns a proposta presentada polo Consello de Administración da entidade nunha Xunta Xeral Extraordinaria para iniciar unha nova ampliación de capital, tras a paralización xudicial do proceso iniciado o pasado mes de setembro.
A diferenza daquela ampliación, a que agora conta con luz verde para ser iniciada terá un valor de case o dobre da frustrada polas denuncias do grupo opositor á dirección do club. En concreto o proceso que se propuxo é de 721.188,30 euros, mediante a emisión de 1.030.269 novas accións cun valor nominal de 0,70 euros.
A variación nas cifras (a anterior ampliación era de 373.599,10 euros) responde á eliminación da prima de emisión a cada nova acción, detalle do que, entre outros aspectos, queixouse o grupo opositor na súa demanda xudicial.
"Por un pequeno defecto formal volmemos á casilla de saída. Quen foi o prexudicado? O Pontevedra Club de Fútbol", afirmou na súa intervención o conselleiro responsable da área económica do club, Enrique Mariño, defendendo a necesidade de "recapitalizar o club" porque "a cifra de fondos propios está por baixo da metade do capital social". Mariño recoñeceu que "se a situación do Pontevedra en xuño do ano pasado era mala cun exercicio de perdas agora non pode ser mellor". De feito de non levar a cabo o proceso "estariamos en causa de disolusción, é unha obrigación deste Consello de Administración propoñer esta ampliación de capital", chegou a dicir o conselleiro.
O obxectivo, explicou, é recuperar as cifras do fondo de manobra da entidade que permitan afrontar sen problemas os pagos a curto prazo do club, xa que "consideramos que é a mellor forma de financiamento para a entidade".
En canto á ampliación anulada polo xulgado, informou, acudiron 60 accionistas e "recadamos 348.366,60 euros", pero segundo engadiu a presidenta, Lupe Murillo, "curiosamente o que non puxo un só céntimo foi o que impugnou".
Aprobada agora pola maioría de accionistas a nova ampliación, o acordo debe ser agora publicado no Boletín Oficial do Rexistro Mercantil (BORME), momento no que empezará a contar o mes de prazo que se dará aos interesados en facerse con novas accións.
Será en todo caso un proceso que "se efectuará nunha única fase e será exclusiva para os actuais accionistas na mesma proporción á súa porcentaxe de participación no capital social", explicaba xa o Pontevedra na convocatoria da Xunta Xeral Extraordinaria.
O representante do grupo opositor á dirección do club anunciou a súa intención de volver impugnar a nova convocatoria.
Relacionadas:
-
O contador da ampliación de capital do Pontevedra, en marcha
Por Diego Espiño |
-
Desvelado o custo real do cambio do céspede de Pasarón
Por Diego Espiño |
-
A tempada en Primeira RFEF pechouse para o Pontevedra con 117.000 euros en perdas
Por Diego Espiño & Mónica Patxot |
-
O Pontevedra propón unha nova ampliación de capital polo dobre de valor da paralizada no xulgado
Por Diego Espiño |
-
A ampliación de capital do Pontevedra, paralizada no xulgado
Por Diego Espiño |
-
O Pontevedra pon en marcha unha ampliación de capital por valor de 373.599 euros
Por Diego Espiño |
-
O Pontevedra incrementou a súa débeda en 390.000 euros no seu último ano en Segunda Federación
Por Manu Otero & Mónica Patxot |
-
O accionariado granate dá poder ao Consello para iniciar a ampliación de capital, á que Pescamar acudirá
Por Manu Otero |